|| শ্রী কামাক্ষীস্তুতি ||
বন্দে কামাক্ষ্যহং ত্বাং বরতনুলতিকাং বিশ্বরক্ষৈকদীক্ষাং
বিষ্বগ্বিশ্বম্ভরায়ামুপগতবসতিং বিশ্রুতামিষ্টদাত্রীম্ ।
বামোরূমাশ্রিতার্তিপ্রশমননিপুণাং বীর্যশৌর্যাদ্যুপেতাং
বন্দারুস্বস্বর্দ্রুমিন্দ্রাদ্যুপগতবিটপাং বিশ্বলোকালবালাম্ ॥
চাপল্যাদিয়মভ্রগা তটিদহো কিঞ্চেৎসদা সর্বগা-
হ্যজ্ঞানাখ্যমুদগ্রমন্ধতমসং নির্ণুদ্য নিস্তন্দ্রিতা ।
সর্বার্থাবলিদর্শিকা চ জলদজ্যোতির্ন চৈষা তথা
যামেবং বিবদন্তি বীক্ষ্য বিবুধাঃ কামাক্ষি নঃ পাহি সা ॥
দোষোৎসৃষ্টবপুঃ কলাং চ সকলাং বিভ্রত্যলং সন্ততং
দূরত্যক্তকলঙ্কিকা জলজনুর্গন্ধস্য দূরস্থিতা ।
জ্যোৎস্নাতো হ্যুপরাগবন্ধরহিতা নিত্যং তমোঘ্না স্থিরা
কামাক্ষীতি সুচন্দ্রিকাতিশয়তা সা পাতু নঃ সর্বদা ॥
দিশ্যাদ্দেবি সদা ত্বদঙ্ঘ্রিকমলদ্বন্দ্বং শ্রিতালিষ্বলং
বৃত্তিং তৎস্বয়মাদধচ্চ বিমুখং দোষাকরাডম্বরে ।
সূর্যাদর্শহসন্মুখং শ্রুতিপথস্যাত্যন্তভূষায়িতং
নেত্রানন্দবিধায়ি পঙ্কমধরীকৃত্যোজ্জ্বলং সদ্ধৃতম্ ॥
কামাক্ষীপদপদ্ময়ুগ্মমনঘং কুর্যান্মদীয়ে মনঃ-
কাসারে বসতিং সদাপি সুমনস্সন্দোহসংরাজিতে ।
সুজ্ঞানামৃতপূরিতে কলুষতাহীনে চ পদ্মালয়ে
নিত্যং সৎকুমুদাশ্রিতে নিজবসত্যাত্তপ্রভাবে সদা ॥
কামক্ষীপদপদ্ময়ুগ্মনখরাঃ সম্যক্কলাসংয়ুতাঃ
নিত্যং সদ্গুণসংশ্রিতাঃ কুবলয়ামোদোদ্ভবাধায়কাঃ ।
উৎকোচং দধতশ্চ পঙ্কজনুষাং সংরোচকাঃ স্থানতঃ
শ্রেষ্ঠাদিন্দুনিরাসকারিবিভবা রক্ষন্তু নঃ সর্বদা ॥
কামাক্ষীচরণারবিন্দয়ুগলীগুল্ফদ্বয়ং রক্ষতা-
দস্মান্ সন্ততমাশ্রিতার্তিশমনং দোষৌঘবিধ্বংসনম্ ।
তেজঃপূরনিধানমঙ্ঘ্রিবলয়াদ্যাকল্পসঙ্ঘট্টন-
প্রোদ্যদ্ধ্বানমিষেণ চ প্রতিশৃণন্নম্রালিরক্ষামিব ॥
জঙ্ঘে দ্বে ভবতাং জগত্ত্রয়নুতে নিত্যং ত্বদীয়ে মন-
স্সন্তোষায় মমামিতোর্জিতয়শঃসম্পত্তয়ে চ স্বয়ম্ ।
সাম্যোলঙ্ঘনজাঙ্ঘিকে সুবপুষা বৃত্তে প্রভাসংয়ুতে
হে কামাক্ষি সমুন্নতে ত্রিভুবনীসঙ্ক্রান্তিয়োগ্যে বরে ॥
কামাক্ষ্যন্বহমেধমানমবতাজ্জানুদ্বয়ং মাং তব
প্রখ্যাতারিপরাভবৈকনিরতি প্রদ্যোতনাভং দ্যুতেঃ ।
সম্যগ্বৃত্তমতীব সুন্দরমিদং সম্পন্নিদানং সতাং
লোকপ্রাভবশংসি সর্বশুভদং জঙ্ঘাদ্বয়োত্তম্ভনম্ ॥
ঊরূ তে ভবতাং মুদে মম সদা কামাক্ষি ভো দেবতে
রম্ভাটোপবিমর্দনৈকনিপুণে নীলোৎপলাভে শুভে ।
শুণ্ডাদণ্ডনিভে ত্রিলোকবিজয়স্তম্ভৌ শুচিত্বার্জব-
শ্রীয়ুক্তে চ নিতম্বভারভরণৈকাগ্রপ্রয়ত্নে সদা ॥
কামাক্ষ্যন্বহমিন্ধতাং নিগনিগপ্রদ্যোতমানং পরং
শ্রীমদ্দর্পণদর্পহারি জঘনদ্বন্দ্রং মহত্তাবকম ।
যত্রেয়ং প্রতিবিম্বিতা ত্রিজগতী সৃষ্টেব ভূয়স্ত্বয়া
লীলার্থং প্রতিভাতি সাগরবনগ্রাবাদিকার্ধাবৃতা ॥
বোভূতাং যশসে মমাম্ব রুচিরৌ ভূলোকসঞ্চারতঃ
শ্রান্তৌ স্থূলতরৌ তবাতিমৃদুলৌ স্নিগ্ধৌ নিতম্বৌ শুভৌ ।
গাঙ্গেয়োন্নতসৈকতস্থলকচগ্রাহিস্বরূপৌ গুণ-
শ্লাঘ্যৌ গৌরবশোভিনৌ সুবিপুলৌ কামাক্ষি ভো দেবতে ॥
কামাক্ষ্যদ্য সুরক্ষতাৎ কটিতটী তাবক্যতীবোজ্জ্বল-
দ্রত্নালঙ্কৃতহাটকাঢ্যরশনাসম্বদ্ধঘণ্টারবা ।
তত্রত্যেন্দুমণীন্দ্রনীলগরুডপ্রখ্যোপলজ্যোতিষা
ব্যাপ্তা বাসবকার্মুকদ্যুতিখনীবাভাতি যা সর্বদা ॥
বস্তিঃ স্বস্তিগতা তবাতিরুচিরা কামাক্ষি ভো দেবতে
সন্তোষং বিদধাতু সন্ততমসৌ পীতাম্বরাষ্টিতা ।
তত্রাপি স্বকয়া শ্রিয়া তত ইতঃ প্রদ্যোতয়ন্তী দিশঃ
কান্তেন্দ্রোপলকান্তিপুঞ্জকণিকেবাভাতি যা সৌষ্ঠবাৎ ॥
যন্নাভীসরসী ভবাভিধমরুক্ষোণীনিবিষ্টোদ্ভব-
ত্তৃষ্ণার্তাখিলদেহিনামনুকলং সুজ্ঞানতোয়ং বরম্ ।
দত্বা দেবি সুগন্ধি সদ্গণসদাসেব্যং প্রণুদ্য শ্রমং
সন্তোষায় চ বোভবীতু মহিতে কামাক্ষি ভো দেবতে ॥
যন্মধ্যং তব দেবি সূক্ষ্মমতুলং লাবণ্যমূলং নভঃ-
প্রখ্যং দুষ্টনিরীক্ষণপ্রসরণশ্রান্ত্যাপনুত্ত্যা ইব ।
জাতং লোচনদূরগং তদবতাৎ কামাক্ষি সিংহান্তর-
স্বৈরাটোপনিরাসকারি বিমলজ্যোতির্ময়ং প্রত্যহম্ ॥
ধৃত্যৈ তে কুচয়োর্বলিত্রয়মিষাৎ সৌবর্ণদামত্রয়ী-
বদ্ধং মধ্যমনুত্তমং সুদৃঢয়োর্গুর্বোর্যযোর্দৈবতে ।
সৌবর্ণৌ কলশাবিবাদ্য চ পয়ঃপূরীকৃতৌ সৎকৃতৌ
তৌ কামাক্ষি মুদং সদা বিতনুতাং ভারং পরাকৃত্য নঃ ॥
পাণী তে শরণাগতাভিলষিতশ্রেয়ঃপ্রদানোদ্যতৌ
সৌভাগ্যাধিকশংসিশাস্ত্রবিহরদ্রেখাঙ্কিতৌ শৌভনৌ ।
স্বর্লোকদ্রুমপঞ্চকং বিতরণে তত্ততৃষাং তস্য ত-
ৎপাত্রালাভবিশঙ্কয়াঙ্গুলিমিষান্মন্যে বিভাত্যত্র হি ॥
দত্তাং দেবি করৌ তবাতিমৃদুলৌ কামাক্ষি সম্পৎকরৌ
সদ্রত্নাঞ্চিতকঙ্কণাদিভিরলং সৌবর্ণকৈর্ভূষিতৌ ।
নিত্যং সম্পদমত্র মে ভবভয়প্রধ্বংসনৈকোৎসুকৌ
সংরক্তৌ চ রসালপল্লবতিরস্কারং গতৌ সুন্দরৌ ॥
ভূয়াস্তাং ভুজগাধিপাবিব মুদে বাহূ সদা মাংসলৌ
কামাক্ষ্যুজ্জ্বলনূত্নরত্নখচিতস্বর্ণাঙ্গদালঙ্কৃতৌ ।
ভাবৎকৌ মম দেবি সুন্দরতরৌ দূরীকৃতদ্বেষণ-
প্রোদ্যদ্বাহুবলৌ জগত্ত্রয়নুতৌ নম্রালিরক্ষাপরৌ ॥
স্কন্ধৌ দেবি তবাপরৌ সুরতরুস্কন্ধাবিবোজ্জৃম্ভিতা-
বস্মান্নিত্যমতন্দ্রিতৌ সমবতাং কামাক্ষি দত্বা ধনম্ ।
কণ্ঠাসক্তসমস্তভূষণরুচিব্যাপ্তৌ স্বয়ং ভাস্বরৌ
লোকাঘৌঘসমস্তনাশনচণাবুত্তম্ভিতাবুদ্দ্যুতী ॥
গ্রীবা কম্বুসমানসংস্থিতিরসৌ কান্ত্যেন্দ্রনীলোপমা
পায়ান্মামনিশং পুরাণবিনুতে কামাক্ষি ভো তাবকী ।
নানারত্নবিভূষণৈঃ সুরুচিরা সৌবর্ণকৈর্মৌত্তিক-
শ্রেষ্টোদ্গুম্ভিতমালয়া চ বিমলা লাবণ্যপাথোনিধিঃ ॥
দেবি ত্বদ্বদনাম্বুজং বিতনুতাচ্ছ্রেয়ঃ পরং শাশ্বতম্ ।
কামাক্ষ্যদ্য মমাম্ব পঙ্কজমিদং যৎকান্তিলাভে (চ্ছয়া) ।
তোয়ে নূনমহর্নিশং চ বিমলে মঙ্ক্ত্বা তপস্যত্যলং
তৎসৌন্দর্যনিধানমগ্র্যসুষমং কান্তালকালঙ্কৃতম্ ॥
নেত্রে তে করুণাকটাক্ষবিশিখৈঃ কামাদিনিত্যদ্বিষো
বাহ্যামপ্যরিসংহতিং মম পরাকৃত্যাবতাং নিত্যশঃ ।
হে কামাক্ষি বিশালতামুপগতে হ্যাকর্ণ মিষ্টাবহে
সাতত্যেন ফলার্থিনাং নিজগতেঃ সম্ফুলকং জায়তে ॥
ভ্রূয়ুগ্মং তব দেবি চাপলতিকাহঙ্কারনির্বাপণং
কান্তং মুগ্ধবিকাসচেষ্টিতমহাভাগ্যাদিসংসূচকম্ ।
কামাক্ষ্যন্বহমেধতাং কৃতপরিস্পন্দং রিপূদ্বাসনে
দীনানিঙ্গিতচেষ্টিতৈরবদিদং সুব্যক্তরূপং পরম্ ॥
নানাসূনবিতানসৌরভপরিগ্রাহৈকলোলালয়ঃ
কিং মাং প্রত্যভিয়ন্তি নেতি কুপিতং তপ্ত্বা তপো দুষ্করম্ ।
নাসীভূয় তবাতিসৌরভবহং ভূত্বাভিতঃ প্রেক্ষণ-
ব্যাজেন প্রিয়কপ্রসূনমলিভিঃ কামাক্ষি ভাত্যাশ্রিতম্ ॥
বক্ত্রং পাতু তবাতিসুন্দরমিদং কামাক্ষি নঃ সর্বদা
শ্রীমৎকুন্দসুকুড্মলাগ্রদশনশ্রেণীপ্রভাশোভিতম্ ।
পুষ্যদ্বিম্বফলারুণাধরপুটং সদ্বীটিকারঞ্জিতং
সৌভাগ্যাতিশয়াভিধায়িহসিতশ্রীশোভিতাশাগণম্ ॥
সন্তোষং শ্রুতিশষ্কুলীয়ুগমিদং সদ্রত্নশোভাস্ফুর-
ত্তাটঙ্কাঢ্যযুগেন ভাস্বররুচা সম্ভূষিতং তাবকম্ ।
কামাক্ষ্যদ্য চরীকরীতু বিমলজ্যোতির্মমানারতং
স্বাভ্যাশস্থিতগণ্ডভাগফলকং সরাজয়জ্জ্যোতিষা ॥
শীর্ষং তে শিরসা নমামি সততং কামাক্ষ্যহং সুন্দরং
সূক্ষ্মং তন্মধুপালিনীলকুটিলশ্রীকুন্তলালঙ্কৃতম্ ।
সীমন্তং সুবিভজ্য তত্র বিপুলশ্রীমন্মণীন্দ্রানিত
স্বর্ণালঙ্করণপ্রভাসুরুচিরং শীর্ষণ্যভূষায়িতম্ ॥
কামাক্ষীশ্বরি কোটিসূর্যনিনসদ্বজ্রাদিরত্নাঞ্চিত-
শ্রীমন্মুগ্ধকিরীটভৃদ্বিতরতাদ্ধন্যং শিরস্তাবকম্ ।
সম্পত্তিং নিতরাং মমাম্ব মনুজাপ্রাপ্যামিহানারতং
লোকেঽমুত্র ভবাভিধং ব তিমিরং লূত্বা সদালিশ্রিতম্ ॥
কামাক্ষীস্তুতিমন্বহং ভুবি নরাঃ শুদ্ধাশ্চ যে ভক্তিতঃ
শৃণ্বন্ত্যত্র পঠন্তি বা স্থিরধিয়ঃ পণ্যামিমামর্থিনঃ ।
দীর্ঘায়ুর্ধনধান্যসম্পদমমী বিন্দন্তি বাণীং যশঃ
সৌভাগ্যং সুতপৌত্রজাতমধিকখ্যাতিং মুদং সর্বদা ॥
কৌণ্ডিন্যান্বয়সম্ভূতরামচন্দ্রার্যসূরিণা ।
নির্মিতা ভাতি কামাক্ষীস্তুতিরেষা সতাং মতা ॥
ইতি শ্রীকামাক্ষীস্তুতিঃ সম্পূর্ণা ।
Found a Mistake or Error? Report it Now
