ತ್ರಿಪುರಾ ಭಾರತೀ ಸ್ತೋತ್ರ

|| ತ್ರಿಪುರಾ ಭಾರತೀ ಸ್ತೋತ್ರ ||

ಐಂದ್ರಸ್ಯೇವ ಶರಾಸನಸ್ಯ ದಧತೀ ಮಧ್ಯೇ ಲಲಾಟಂ ಪ್ರಭಾಂ
ಶೌಕ್ಲೀಂ ಕಾಂತಿಮನುಷ್ಣಗೋರಿವ ಶಿರಸ್ಯಾತನ್ವತೀ ಸರ್ವತಃ .
ಏಷಾಽಸೌ ತ್ರಿಪುರಾ ಹೃದಿ ದ್ಯುತಿರಿವೋಷ್ಣಾಂಶೋಃ ಸದಾಹಃಸ್ಥಿತಾ
ಛಿಂದ್ಯಾನ್ನಃ ಸಹಸಾ ಪದೈಸ್ತ್ರಿಭಿರಘಂ ಜ್ಯೋತಿರ್ಮಯೀ ವಾಙ್ಮಯೀ ..

ಯಾ ಮಾತ್ರಾ ತ್ರಪುಸೀಲತಾತನುಲಸತ್ತಂತೂತ್ಥಿತಿಸ್ಪರ್ದ್ಧಿನೀ
ವಾಗ್ಬೀಜೇ ಪ್ರಥಮೇ ಸ್ಥಿತಾ ತವ ಸದಾ ತಾಂ ಮನ್ಮಹೇ ತೇ ವಯಂ .
ಶಕ್ತಿಃ ಕುಂಡಲಿನೀತಿ ವಿಶ್ವಜನನವ್ಯಾಪಾರಬದ್ಧೋದ್ಯಮಾ
ಜ್ಞಾತ್ವೇತ್ಥಂ ನ ಪುನಃ ಸ್ಪೃಶಂತಿ ಜನನೀಗರ್ಭೇಽರ್ಭಕತ್ವಂ ನರಾಃ ..

ದೃಷ್ಟ್ವಾ ಸಂಭ್ರಮಕಾರಿ ವಸ್ತು ಸಹಸಾ ಐ ಐ ಇತಿ ವ್ಯಾಹೃತಂ
ಯೇನಾಕೂತವಶಾದಪೀಹ ವರದೇ ಬಿಂದುಂ ವಿನಾಽಪ್ಯಕ್ಷರಂ .
ತಸ್ಯಾಪಿ ಧ್ರುವಮೇವ ದೇವಿ ತರಸಾ ಜಾತೇ ತವಾಽನುಗ್ರಹೇ
ವಾಚಃ ಸೂಕ್ತಿಸುಧಾರಸದ್ರವಮುಚೋ ನಿರ್ಯಾಂತಿ ವಕ್ತ್ರಾಂಬುಜಾತ್ ..

ಯನ್ನಿತ್ಯೇ ತವ ಕಾಮರಾಜಮಪರಂ ಮಂತ್ರಾಕ್ಷರಂ ನಿಷ್ಕಲಂ
ತತ್ ಸಾರಸ್ವತಮಿತ್ಯವೈತಿ ವಿರಲಃ ಕಶ್ಚಿದ್ ಬುಧಶ್ಚೇದ್ ಭುವಿ .
ಆಖ್ಯಾನಂ ಪ್ರತಿಪರ್ವ ಸತ್ಯತಪಸೋ ಯತ್ಕೀರ್ತಯಂತೋ ದ್ವಿಜಾಃ
ಪ್ರಾರಂಭೇ ಪ್ರಣವಾಸ್ಪದಂ ಪ್ರಣಯಿತಾಂ ನೀತ್ವೋಚ್ಚರಂತಿ ಸ್ಫುಟಂ ..

ಯತ್ಸದ್ಯೋ ವಚಸಾಂ ಪ್ರವೃತ್ತಿಕರಣೇ ದೃಷ್ಟಪ್ರಭಾವಂ ಬುಧೈ-
ಸ್ತಾರ್ತೀಯೀಕಮಹಂ ನಮಾಮಿ ಮನಸಾ ತದ್ಬೀಜಮಿಂದುಪ್ರಭಂ .
ಅಸ್ತ್ವೌರ್ವೋಽಪಿ ಸರಸ್ವತೀಮನುಗತೋ ಜಾಡ್ಯಾಂಬುವಿಚ್ಛಿತ್ತಯೇ
ಗೌಃಶಬ್ದೋ ಗಿರಿ ವರ್ತತೇ ಸ ನಿಯತಂ ಯೋಗಂ ವಿನಾ ಸಿದ್ಧಿದಃ ..

ಏಕೈಕಂ ತವ ದೇವಿ ಬೀಜಮನಘಂ ಸವ್ಯಂಜನಾವ್ಯಂಜನಂ
ಕೂಟಸ್ಥಂ ಯದಿ ವಾ ಪೃಥಕ್ಕ್ರಮಗತಂ ಯದ್ವಾ ಸ್ಥಿತಂ ವ್ಯುತ್ಕ್ರಮಾತ್ .
ಯಂ ಯಂ ಕಾಮಮಪೇಕ್ಷ್ಯ ಯೇನ ವಿಧಿನಾ ಕೇನಾಪಿ ವಾ ಚಿಂತಿತಂ
ಜಪ್ತಂ ವಾ ಸಫಲೀಕರೋತಿ ತರಸಾ ತಂ ತಂ ಸಮಸ್ತಂ ನೃಣಾಂ ..

ವಾಮೇ ಪುಸ್ತಕಧಾರಿಣೀಮಭಯದಾಂ ಸಾಕ್ಷಸ್ರಜಂ ದಕ್ಷಿಣೇ
ಭಕ್ತೇಭ್ಯೋ ವರದಾನಪೇಶಲಕರಾಂ ಕರ್ಪೂರಕುಂದೋಜ್ಜ್ವಲಾಂ .
ಉಜ್ಜೃಂಭಾಂಬುಜಪತ್ರಕಾಂತನಯನಸ್ನಿಗ್ಧಪ್ರಭಾಲೋಕಿನೀಂ
ಯೇ ತ್ವಾಮಂಬ ನ ಶೀಲಯಂತಿ ಮನಸಾ ತೇಷಾಂ ಕವಿತ್ವಂ ಕುತಃ ..

ಯೇ ತ್ವಾಂ ಪಾಂಡುರಪುಂಡರೀಕಪಟಲಸ್ಪಷ್ಟಾಭಿರಾಮಪ್ರಭಾಂ
ಸಿಂಚಂತೀಮಮೃತದ್ರವೈರಿವ ಶಿರೋ ಧ್ಯಾಯಂತಿ ಮೂರ್ಧ್ನಿ ಸ್ಥಿತಾಂ .
ಅಶ್ರಾಂತಂ ವಿಕಟಸ್ಫುಟಾಕ್ಷರಪದಾ ನಿರ್ಯಾತಿ ವಕ್ತ್ರಾಂಬುಜಾತ್
ತೇಷಾಂ ಭಾರತಿ ಭಾರತೀ ಸುರಸರಿತ್ಕಲ್ಲೋಲಲೋಲೋರ್ಮ್ಮಿಭಿಃ ..

ಯೇ ಸಿಂದೂರಪರಾಗಪುಂಜಪಿಹಿತಾಂ ತ್ವತ್ತೇಜಸಾ ದ್ಯಾಮಿಮಾ-
ಮುರ್ವೀ ಚಾಪಿ ವಿಲೀನಯಾವಕರಸಪ್ರಸ್ತಾರಮಗ್ನಾಮಿವ .
ಪಶ್ಯಂತಿ ಕ್ಷಣಮಪ್ಯನನ್ಯಮನಸಸ್ತೇಷಾಮನಂಗಜ್ವರ-
ಕ್ಲಾಂತಾಸ್ತ್ರಸ್ತಕುರಂಗಶಾವಕದೃಶೋ ವಶ್ಯಾ ಭವಂತಿ ಸ್ತ್ರಿಯಃ ..

ಚಂಚತ್ಕಾಂಚನಕುಂಡಲಾಂಗದಧರಾಮಾಬದ್ಧಕಾಂಚೀಸ್ರಜಂ
ಯೇ ತ್ವಾಂ ಚೇತಸಿ ತದ್ಗತೇ ಕ್ಷಣಮಪಿ ಧ್ಯಾಯಂತಿ ಕೃತ್ವಾ ಸ್ಥಿರಂ .
ತೇಷಾಂ ವೇಶ್ಮನಿ ವಿಭ್ರಮಾದಹರಹಃ ಸ್ಫಾರೀ ಭವಂತ್ಯಶ್ಚಿರಾದ್
ಮಾದ್ಯತ್ಕುಂಜರಕರ್ಣತಾಲತರಲಾಃ ಸ್ಥೈರ್ಯಂ ಭಜಂತೇ ಶ್ರಿಯಃ ..

ಆರ್ಭಟ್ಯಾ ಶಶಿಖಂಡಮಂಡಿತಜಟಾಜೂಟಾಂ ನೃಮುಂಡಸ್ರಜಂ
ಬಂಧೂಕಪ್ರಸವಾರುಣಾಂಬರಧರಾಂ ಪ್ರೇತಾಸನಾಧ್ಯಾಸಿನೀಂ .
ತ್ವಾಂ ಧ್ಯಾಯಂತಿ ಚತುರ್ಭುಜಾಂ ತ್ರಿನಯನಾಮಾಪೀನತುಂಗಸ್ತನೀಂ
ಮಧ್ಯೇ ನಿಮ್ನವಲಿತ್ರಯಾಂಕಿತತನುಂ ತ್ವದ್ರೂಪಸಂಪತ್ತಯೇ ..

ಜಾತೋಽಪ್ಯಲ್ಪಪರಿಚ್ಛದೇ ಕ್ಷಿತಿಭೃತಾಂ ಸಾಮಾನ್ಯಮಾತ್ರೇ ಕುಲೇ
ನಿಃಶೇಷಾವನಿಚಕ್ರವರ್ತಿಪದವೀಂ ಲಬ್ಧ್ವಾ ಪ್ರತಾಪೋನ್ನತಃ .
ಯದ್ವಿದ್ಯಾಧರವೃಂದವಂದಿತಪದಃ ಶ್ರೀವತ್ಸರಾಜೋಽಭವದ್
ದೇವಿ ತ್ವಚ್ಚರಣಾಂಬುಜಪ್ರಣತಿಜಃ ಸೋಽಯಂ ಪ್ರಸಾದೋದಯಃ ..

ಚಂಡಿ ತ್ವಚ್ಚರಣಾಂಬುಜಾರ್ಚನಕೃತೇ ಬಿಲ್ವೀದಲೋಲ್ಲುಂಟನ-
ತ್ರುಟ್ಯತ್ಕಂಟಕಕೋಟಿಭಿಃ ಪರಿಚಯಂ ಯೇಷಾಂ ನ ಜಗ್ಮುಃ ಕರಾಃ .
ತೇ ದಂಡಾಂಕುಶಚಕ್ರಚಾಪಕುಲಿಶಶ್ರೀವತ್ಸಮತ್ಸ್ಯಾಂಕಿತೈ-
ರ್ಜಾಯಂತೇಪೃಥಿವೀಭುಜಃ ಕಥಮಿವಾಂಭೋಜಪ್ರಭೈಃ ಪಾಣಿಭಿಃ ..

ವಿಪ್ರಾಃ ಕ್ಷೋಣಿಭುಜೋ ವಿಶಸ್ತದಿತರೇ ಕ್ಷೀರಾಜ್ಯಮಧ್ವೈಕ್ಷವೈ
ಸ್ತ್ವಾಂ ದೇವಿ ತ್ರಿಪುರೇ ಪರಾಪರಕಲಾಂ ಸಂತರ್ಪ್ಯ ಪೂಜಾವಿಧೌ .
ಯಾಂ ಯಾಂ ಪ್ರಾರ್ಥಯತೇ ಮನಃ ಸ್ಥಿರಧಿಯಾಂ ತೇಷಾಂ ತ ಏವ ಧ್ರುವಂ
ತಾಂ ತಾಂ ಸಿದ್ಧಿಮವಾಪ್ನುವಂತಿ ತರಸಾ ವಿಘ್ನೈರವಿಘ್ನೀಕೃತಾ ..

ಶಬ್ದಾನಾಂ ಜನನೀ ತ್ವಮತ್ರ ಭುವನೇ ವಾಗ್ವಾದಿನೀತ್ಯುಚ್ಯಸೇ
ತ್ವತ್ತಃ ಕೇಶವವಾಸವಪ್ರಭೃತಯೋಽಪ್ಯಾವಿರ್ಭವಂತಿ ಧ್ರುವಂ .
ಲೀಯಂತೇ ಖಲು ಯತ್ರ ಕಲ್ಪವಿರತೌ ಬ್ರಹ್ಮಾದಯಸ್ತೇಽಪ್ಯಮೀ
ಸಾ ತ್ವಂ ಕಾಚಿದಚಿಂತ್ಯರೂಪಮಹಿಮಾ ಶಕ್ತಿಃ ಪರಾ ಗೀಯಸೇ ..

ದೇವಾನಾಂ ತ್ರಿತಯಂ ತ್ರಯೀ ಹುತಭುಜಾಂ ಶಕ್ತಿತ್ರಯಂ ತ್ರಿಸ್ವರಾ
ಸ್ತ್ರೈಲೋಕ್ಯಂ ತ್ರಿಪದೀ ತ್ರಿಪುಷ್ಕರಮಥ ತ್ರಿಬ್ರಹ್ಮ ವರ್ಣಾಸ್ತ್ರಯಃ .
ಯತ್ಕಿಂಚಿಜ್ಜಗತಿ ತ್ರಿಧಾ ನಿಯಮಿತಂ ವಸ್ತು ತ್ರಿವರ್ಗಾದಿಕಂ
ತತ್ಸರ್ವಂ ತ್ರಿಪುರೇತಿ ನಾಮ ಭಗವತ್ಯನ್ವೇತಿ ತೇ ತತ್ತ್ವತಃ ..

ಲಕ್ಷ್ಮೀಂ ರಾಜಕುಲೇ ಜಯಾಂ ರಣಮುಖೇ ಕ್ಷೇಮಂಕರೀಮಧ್ವನಿ
ಕ್ರವ್ಯಾದದ್ವಿಪಸರ್ಪಭಾಜಿ ಶಬರೀಂ ಕಾಂತಾರದುರ್ಗೇ ಗಿರೌ .
ಭೂತಪ್ರೇತಪಿಶಾಚಜೃಂಭಕಭಯೇ ಸ್ಮೃತ್ವಾ ಮಹಾಭೈರವೀಂ
ವ್ಯಾಮೋಹೇ ತ್ರಿಪುರಾಂ ತರಂತಿ ವಿಪದಸ್ತಾರಾಂ ಚ ತೋಯಪ್ಲವೇ ..

ಮಾಯಾ ಕುಂಡಲಿನೀ ಕ್ರಿಯಾ ಮಧುಮತೀ ಕಾಲೀ ಕಲಾಮಾಲಿನೀ
ಮಾತಂಗೀ ವಿಜಯಾ ಜಯಾ ಭಗವತೀ ದೇವೀ ಶಿವಾ ಶಾಂಭವೀ .
ಶಕ್ತಿಃ ಶಂಕರವಲ್ಲಭಾ ತ್ರಿನಯನಾ ವಾಗ್ವಾದಿನೀ ಭೈರವೀ
ಹ್ರೀಂಕಾರೀ ತ್ರಿಪುರಾ ಪರಾಪರಮಯೀ ಮಾತಾ ಕುಮಾರೀತ್ಯಸಿ ..

ಆ ಈ ಪಲ್ಲವಿತೈಃ ಪರಸ್ಪರಯುತೈರ್ದ್ವಿತ್ರಿಕ್ರಮಾದ್ಯಕ್ಷರೈಃ
ಕಾದ್ಯೈಃ ಕ್ಷಾಂತಗತೈಃ ಸ್ವರಾದಿಭಿರಥ ಕ್ಷಾಂತೈಶ್ಚ ತೈಃ ಸಸ್ವರೈಃ .
ನಾಮಾನಿ ತ್ರಿಪುರೇ ಭವಂತಿ ಖಲು ಯಾನ್ಯತ್ಯಂತಗುಹ್ಯಾನಿ ತೇ
ತೇಭ್ಯೋ ಭೈರವಪತ್ನಿ ವಿಂಶತಿಸಹಸ್ರೇಭ್ಯಃ ಪರೇಭ್ಯೋ ನಮಃ ..

ಬೋದ್ಧವ್ಯಾ ನಿಪುಣಂ ಬುಧೈಸ್ತುತಿರಿಯಂ ಕೃತ್ವಾ ಮನಸ್ತದ್ಗತಂ
ಭಾರತ್ಯಾಸ್ತ್ರಿಪುರೇತ್ಯನನ್ಯಮನಸೋ ಯತ್ರಾದ್ಯವೃತ್ತೇ ಸ್ಫುಟಂ .
ಏಕದ್ವಿತ್ರಿಪದಕ್ರಮೇಣ ಕಥಿತಸ್ತತ್ಪಾದಸಂಖ್ಯಾಕ್ಷರೈ-
ರ್ಮಂತ್ರೋದ್ಧಾರವಿಧಿರ್ವಿಶೇಷಸಹಿತಃ ಸತ್ಸಂಪ್ರದಾಯಾನ್ವಿತಃ ..

ಸಾವದ್ಯಂ ನಿರವದ್ಯಮಸ್ತು ಯದಿ ವಾ ಕಿಂವಾಽನಯಾ ಚಿಂತಯಾ
ನೂನಂ ಸ್ತೋತ್ರಮಿದಂ ಪಠಿಷ್ಯತಿ ಜನೋ ಯಸ್ಯಾಸ್ತಿ ಭಕ್ತಿಸ್ತ್ವಯಿ .
ಸಂಚಿಂತ್ಯಾಪಿ ಲಘುತ್ವಮಾತ್ಮನಿ ದೃಢಂ ಸಂಜಾಯಮಾನಂ ಹಠಾತ್
ತ್ವದ್ಭಕ್ತ್ಯಾ ಮುಖರೀಕೃತೇನ ರಚಿತಂ ಯಸ್ಮಾನ್ಮಯಾಪಿ ಧ್ರುವಂ ..

Found a Mistake or Error? Report it Now