श्रीयादवाष्टकम्

|| श्रीयादवाष्टकम् ||

माधवानन्त केशवाच्युत वासुदेव जगत्पते
मीन कच्छप नारसिंह श्रीवीरराघव पाहि माम् ।
निर्जरार्चित मौनिसन्नुत नीरजाक्ष दयानिधे
देवनायक देहि मे तव पादभक्तिमचञ्चलाम् ॥ १॥

श्रीकरं करुणाकरं मुनिमानसाम्बुजवासिनं
पाकशासनसेवितं फणिराजतल्पसुशायिनम् ।
शोकमोहविनाशकं सुगुणाकरं शुभदायकं
लोकजीवनहेतुकं प्रणमामि यादवकुञ्जरम् ॥ २॥

कृष्ण श्रीधर वासवानुज पद्मनाभ नमोऽस्तु ते
किङ्किणीघननाददिव्यसुपादपद्म नमोऽस्तु ते ।
वृष्णिवंशप्रदीप नायक वेदवेद्य नमोऽस्तु ते
विप्रसंस्तुत मेघवर्ण सुपर्णवाह नमोऽस्तु ते ॥ ३॥

देवकीतनुसम्भवं त्रिगुणात्मकं जगदीश्वरं
दिव्यकौस्तुभशोभितं शुभशङ्खचक्रगदाधरम् ।
भावुकं पशुपालनं परमात्मकं भयनाशकं
दिव्यभागवतस्तुतं प्रणमामि यादवकुञ्जरम् ॥ ४॥

नन्दगोपकुमारकं नवरत्नकुण्डलभूषितं
नन्दिताश्रितपोषकं रविकोटिकान्तिसमप्रभम् ।
कुन्दकैतकल्लिकादिसुगन्धपुष्पसमर्चितं
इन्दुवंशविवर्धनं प्रणमामि यादवकुञ्जरम् ॥ ५॥

क्रूरकंसविमर्दनं मुचुकुन्दमोक्षणदायकं
चारुकेलिरसप्रियं शतकोटिमन्मथविग्रहम् ।
नीरजासनपूजितं नवनीतदिग्धकलेवरं
क्षीरसिन्धुनिवासिनं प्रणमामि यादवकुञ्जरम् ॥ ६॥

पूतनासुविभञ्जनं परिपूर्णचन्द्रनिभाननं
चूतपल्लवकोमलाधरमारुताञ्चितवांशिकम् ।
गीतनाट्यरसप्रियं सुरगीयमानयशोधरं
पीतवाससमव्ययं प्रणमामि यादवकुञ्जरम् ॥ ७॥

कोपमूर्छितकौरवादिविमर्दनं गुणसागरं
गोपिकाकुचकलचुकाहरणादरं कुलदैवतम् ।
चापवेदसुपारगं समशास्त्रधर्मविशारदं
क्लेशपापविमोचनं प्रणमामि यादवकुञ्जरम् ॥ ८॥

चन्द्रभानुविलोचनं मणिहारभूषणधारिणं
सुन्दरं नवरत्ननूपुरशोभिताङ्घ्रिसरोरुहम् ।
मन्दहासविराजितं वरबर्हि पिञ्छवतंसिनं
नन्दगोकुलवर्धनं प्रणमामि यादवकुञ्जरम् ॥ ९॥

मेरुशैलसमानधैर्यममेयरूपमजार्चितं
चारुमन्नवनीतचोरमखण्डरूपमनामयम् ।
पारिजातहरं परं बलभद्ररामसहोदरं
क्षुद्रकालियभञ्जनं प्रणमामि यादवकुञ्जरम् ॥ १०॥

शिष्टपालनतत्परं शिवदायकं जगदात्मकं
इष्टकामफलप्रदं भक्त (नत) वेङ्कटाचलवन्दितम् ।
दुष्टकर्मविनाशकं सर्वदोषरोगनिवारणं
अष्टभूतिप्रदायकं प्रणमामि यादवकुञ्जरम् ॥ ११॥

कृष्ण कृष्ण नमस्तेऽस्तु त्वयि भक्तिमचञ्चलाम् ।
इष्टकामार्थसिद्धिं च देहि मे मधुसूदन ॥ १२॥

यादवाष्टकमिदं पुण्यं यः पठेत् सततं नरः ।
सर्वसिद्धिं च सम्प्राप्य श्रीकृष्णपदमाप्नुयात् ॥ १३॥

इति श्रीयादवाष्टकं सम्पूर्णम् ।

• hindiश्री अच्युताष्टकम्
• hindiश्री नन्दकुमार अष्टकम्
• hindiश्री गोविन्दाष्टकम्
• hindiमधुराष्टकम्
• hindiश्री युगलाष्टकम्
• hindiश्री कृष्णाष्टकम्
• malayalamശ്രീ നന്ദകുമാരാഷ്ടകം
• kannadaಶ್ರೀ ನಂದಕುಮಾರಾಷ್ಟಕಂ
• teluguశ్రీ నందకుమారాష్టకం
• gujaratiશ્રી નન્દકુમારાષ્ટકમ્
• odiaଶ୍ରୀ ନନ୍ଦକୁମାରାଷ୍ଟକମ୍
• tamilஶ்ரீ நந்த³குமாராஷ்டகம்
• assameseশ্ৰী নন্দকুমাৰাষ্টকম্
• punjabiਸ਼੍ਰੀ ਨਨ੍ਦਕੁਮਾਰਾਸ਼਼੍ਟਕਮ੍
• bengaliশ্রী নন্দকুমারাষ্টকম্

Found a Mistake or Error? Report it Now