|| Narada Kruta Sri Rama Stuti ||
śrīrāmaṁ muniviśrāmaṁ janasaddhāmaṁ hr̥dayārāmaṁ
sītārañjana satyasanātana rājārāmaṁ ghanaśyāmam |
nārīsaṁstuta kālindīnata nidrāprārthita bhūpālaṁ
rāmaṁ tvāṁ śirasā satataṁ praṇamāmi cchēdita sattālam || 1 ||
nānārākṣasahantāraṁ śaradhartāraṁ janatādhāraṁ
vālīmardana sāgarabandhana nānākautukakartāram |
paurānandada nārītōṣaka kastūrīyuta satphālaṁ
rāmaṁ tvāṁ śirasā satataṁ praṇamāmi cchēdita sattālam || 2 ||
śrīkāntaṁ jagatīkāntaṁ stutasadbhaktaṁ bahusadbhaktaṁ
sadbhaktahr̥dayēpsitapūraka padmākṣaṁ nr̥pajākāntam |
pr̥thvījāpati viśvāmitrasuvidyādarśitasacchīlaṁ
rāmaṁ tvāṁ śirasā satataṁ praṇamāmi cchēdita sattālam || 3 ||
sītārañjitaviśvēśaṁ dharapr̥thvīśaṁ suralōkēśaṁ
grāvōddhāraṇa rāvaṇamardana tadbhrātr̥kr̥talaṅkēśam |
kiṣkindhākr̥tasugrīvaṁ plavagabr̥ndādhipa satpālaṁ
rāmaṁ tvāṁ śirasā satataṁ praṇamāmi cchēdita sattālam || 4 ||
śrīnāthaṁ jagatāṁnāthaṁ jagatīnāthaṁ nr̥patīnāthaṁ
bhūdēvāsuranirjarapannaga-gandharvādikasannātham |
kōdaṇḍadhr̥ta tūṇīrānvita saṅgrāmēkr̥ta bhūpālaṁ
rāmaṁ tvāṁ śirasā satataṁ praṇamāmi cchēdita sattālam || 5 ||
rāmēśaṁ jagatāmīśaṁ jambudvīpēśaṁ natalōkēśaṁ
vālmīkikr̥tasaṁstavaharṣita sītālālita vāgīśam |
pr̥thvīśaṁ hr̥tabhūbhāraṁ satayōgīndraṁ jagatīpālaṁ
rāmaṁ tvāṁ śirasā satataṁ praṇamāmi cchēdita sattālam || 6 ||
cidrūpaṁ jitasadbhūpaṁ natasadbhaktaṁ natasadbhūpaṁ
saptadvīpajavarṣajakāminisaṁnīrājita pr̥thvīśam |
nānāpārthiva nānōpāyana samyaktōṣita sadbhūpaṁ
rāmaṁ tvāṁ śirasā satataṁ praṇamāmi cchēdita sattālam || 7 ||
saṁsēvyaṁ munibhirgēyaṁ kavibhiḥ stavyaṁ hr̥di sandhyāraṁ
nānāpaṇḍitatarkapurāṇajavākyairdhikkr̥tasatkāvyam |
sākētasthita kausalyāsuta gandhādyaṅkita satphālaṁ
rāmaṁ tvāṁ śirasā satataṁ praṇamāmi cchēdita sattālam || 8 ||
bhūpālaṁ ghanasannīlaṁ nr̥pasadbālaṁ kalisaṅkālaṁ
sītājāniṁ varōtpalalōcana mantrīmōcita tatkālam |
śrīsītākr̥tapadmāsvādana samyakśikṣita tatkālaṁ
rāmaṁ tvāṁ śirasā satataṁ praṇamāmi cchēdita sattālam || 9 ||
hē rājan navabhiḥ ślōkaiḥ bhuvipāpaharaṁ navakaṁ ramyaṁ
mē buddhyākr̥tamuttama nūtanamētadrāghavamartyānam |
strīpautrānnādikakṣēmapradamasmatsadvaradaṁ bālaṁ
rāmaṁ tvāṁ śirasā satataṁ praṇamāmi cchēdita sattālam || 10 ||
iti śrī nārada kr̥ta śrīrāmastutiḥ |
Found a Mistake or Error? Report it Now
