|| శ్రీ రామ స్తుతిః (నారద కృతం) ||
శ్రీరామం మునివిశ్రామం జనసద్ధామం హృదయారామం
సీతారంజన సత్యసనాతన రాజారామం ఘనశ్యామమ్ |
నారీసంస్తుత కాళిందీనత నిద్రాప్రార్థిత భూపాలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౧ ||
నానారాక్షసహంతారం శరధర్తారం జనతాధారం
వాలీమర్దన సాగరబంధన నానాకౌతుకకర్తారమ్ |
పౌరానందద నారీతోషక కస్తూరీయుత సత్ఫాలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౨ ||
శ్రీకాంతం జగతీకాంతం స్తుతసద్భక్తం బహుసద్భక్తం
సద్భక్తహృదయేప్సితపూరక పద్మాక్షం నృపజాకాంతమ్ |
పృథ్వీజాపతి విశ్వామిత్రసువిద్యాదర్శితసచ్ఛీలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౩ ||
సీతారంజితవిశ్వేశం ధరపృథ్వీశం సురలోకేశం
గ్రావోద్ధారణ రావణమర్దన తద్భ్రాతృకృతలంకేశమ్ |
కిష్కింధాకృతసుగ్రీవం ప్లవగబృందాధిప సత్పాలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౪ ||
శ్రీనాథం జగతాంనాథం జగతీనాథం నృపతీనాథం
భూదేవాసురనిర్జరపన్నగ-గంధర్వాదికసన్నాథమ్ |
కోదండధృత తూణీరాన్విత సంగ్రామేకృత భూపాలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౫ ||
రామేశం జగతామీశం జంబుద్వీపేశం నతలోకేశం
వాల్మీకికృతసంస్తవహర్షిత సీతాలాలిత వాగీశమ్ |
పృథ్వీశం హృతభూభారం సతయోగీంద్రం జగతీపాలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౬ ||
చిద్రూపం జితసద్భూపం నతసద్భక్తం నతసద్భూపం
సప్తద్వీపజవర్షజకామినిసంనీరాజిత పృథ్వీశమ్ |
నానాపార్థివ నానోపాయన సమ్యక్తోషిత సద్భూపం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౭ ||
సంసేవ్యం మునిభిర్గేయం కవిభిః స్తవ్యం హృది సంధ్యారం
నానాపండితతర్కపురాణజవాక్యైర్ధిక్కృతసత్కావ్యమ్ |
సాకేతస్థిత కౌసల్యాసుత గంధాద్యంకిత సత్ఫాలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౮ ||
భూపాలం ఘనసన్నీలం నృపసద్బాలం కలిసంకాలం
సీతాజానిం వరోత్పలలోచన మంత్రీమోచిత తత్కాలమ్ |
శ్రీసీతాకృతపద్మాస్వాదన సమ్యక్శిక్షిత తత్కాలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౯ ||
హే రాజన్ నవభిః శ్లోకైః భువిపాపహరం నవకం రమ్యం
మే బుద్ధ్యాకృతముత్తమ నూతనమేతద్రాఘవమర్త్యానమ్ |
స్త్రీపౌత్రాన్నాదికక్షేమప్రదమస్మత్సద్వరదం బాలం
రామం త్వాం శిరసా సతతం ప్రణమామి చ్ఛేదిత సత్తాలమ్ || ౧౦ ||
ఇతి శ్రీ నారద కృత శ్రీరామస్తుతిః |
Found a Mistake or Error? Report it Now
