শ্রী দত্তাত্রেয় হৃদয়ম্

|| শ্রী দত্তাত্রেয় হৃদয়ম্ ||

প্রহ্লাদ একদারণ্যং পর্যটন্মৃগয়ামিষাৎ ।
ভাগ্যাদ্দদর্শ সহ্যাদ্রৌ কাবের্যাং নিদ্রিতা ভুবি ॥

কর্মাদ্যৈর্বর্ণলিঙ্গাদ্যৈরপ্রতক্র্যং রজস্বলম্ ।
নত্বা প্রাহাবধূতং তং নিগূঢামলতেজসম্ ॥

কথং ভোগীব ধত্তেঽস্বঃ পীনাং তনুমনুদ্যমঃ ।
উদ্যোগাৎস্বং ততো ভোগো ভোগাৎপীনা তনুর্ভবেৎ ॥

শয়ানোঽনুদ্যমোঽনীহো ভবানিহ তথাপ্যসৌ ।
পীনা তনুং কথং সিদ্ধো ভবান্বদতু চেৎক্ষমম্ ॥

বিদ্বান্দক্ষোঽপি চতুরশ্চিত্রপ্রিয়কথো ভবান্ ।
দৃষ্ট্বাপীহ জনাংশ্চিত্রকর্মণো বর্ততে সমঃ ॥

ইত্থং শ্রীভগবাংস্তেন প্রহ্যাদেনাত্রিনন্দনঃ ।
সম্পৃষ্টঃ প্রাহ সন্তুষ্টঃ কৃপালুঃ প্রহসন্নিব ॥

শ্রীনৃসিংহোঽবতীর্ণোঽত্র যদর্থং স ত্বমেব হি ।
দৈত্যজোঽপি মুনিচ্ছাত্র শৃণু ভাগবতোত্তম ॥

মন্দঃ স্বজ্ঞো ভ্রমংস্তৃষ্ণানদ্যেমং লোকমাগতঃ ।
কর্ময়োগেন মুক্তিস্বর্মোহদ্বারং যদৃচ্ছয়া ॥

নিবৃত্তোঽস্ম্যত্র যততাং ব্যত্যযং বীক্ষ্য শর্মণে ।
আত্মনোঽস্য সুখং রূপং ক্লিষ্টে নষ্টে স্বয়ং প্রভম্ ॥

জ্ঞাত্বা সংস্পর্শজান্ভোগান্দুঃখাৎস্বপ্স্যামি দৈবভুক্ ।
বিস্মৃত্যামুং জনঃ স্বার্থং সন্তং যাত্যুগ্রসংসৃতিম্ ॥

স্বার্থং মায়াবৃতং ত্যক্ত্বা তদর্থ্যন্যত্র ধাবতি ।
শৈবালছন্নকং ত্যক্ত্বা যথাম্ব্বর্থী মরীচিকাম্ ॥

অভাগ্যস্য ক্রিয়া মোঘাঃ সুখপ্রাপ্ত্যৈ প্রয়োজিতাঃ ।
তৎসাফল্যেঽপ্যসদ্ভিঃ কিং কার্যং মত্র্যস্য কৃচ্ছ্রজৈঃ ॥

কামার্তেচ্ছোর্মোহশোকরাগদ্বেষশ্রমাদয়ঃ ।
যতোঽজিতাত্মনো নৈতি নিদ্রাপি ভয়শঙ্কয়া ॥

প্রাণার্থেচ্ছা হি মধুকৃচ্ছিক্ষিতেন ময়োঝ্ঝিতা ।
রাজার্থিহিংস্রচোরদ্বিট্কালেভ্যো ন বিভেম্যতঃ ॥

নিরিচ্ছঃ পরিতুষ্টাত্মা যদৃচ্ছালাভতোঽস্মি সন্ ।
বহুকালং শয়ে নো চেদ্বিদ্বান্ ধৈর্যান্মহাহিবৎ ॥

ভূর্যল্পং স্বাদু বাঽস্বাদু কদন্নং মানবর্জিতম্ ।
সমানং ক্বাপি ভুঞ্জেঽহ্নি নিশি ভুক্ত্বাপি বা ন বা ॥

হরত্যন্যঃ পতিং হত্বা কৃচ্ছ্রাপ্তং মধুবদ্ধনম্ ।
শিক্ষিতং মধুকৃত্তোঽতো বিরক্তোঽস্ম্যপরিগ্রহঃ ॥

দৈবাপ্তং চর্ম বল্কং বা বস্ত্রং ক্ষৌমং বসে ন বা ।
ক্বচিচ্ছয়েঽশ্মভস্মাদৌ কশিপৌ বা জনে বনে ॥

ক্বচিৎস্নাতোঽলঙ্কৃতোঽহং স্রগ্বী সুবসনো ন বা ।
রথেভাশ্বৌশ্চরে ক্বাপি মুনিবৎক্বাপি মুগ্ধবৎ ॥

নাহং নিন্দে ন চ স্তৌমি স্বভাববিষমং নরম্ ।
এতেষাং শ্রেয় আশাস উতৈকাত্ম্যমথাত্মনি ॥

ব্রহ্মাসক্তো ব্রহ্মনিষ্ঠো ব্রহ্মাত্মা ব্রহ্মধীরহম্ ।
সংস্কৃতে ব্রাহ্মণেঽন্ত্যে বা সমদৃগ্গবি শুন্যপি ॥

সমাসমাভ্যাং বিষমসমে পূজাত ওদনম্ ।
নাদ্যাদিত্যজ্ঞগৃহিণো দোষো ন সমদৃগ্যতেঃ ॥

স্বরূপেঽবাসনস্তিষ্ঠাম্যান্বীক্ষিক্যাঽনয়া দিবি ।
যোঽমুমিচ্ছেত্তু তস্যায়মুপায়ো বিদুষঃ সুখঃ ॥

হুনেদ্বিকল্পং চিত্তৌ তাং মনস্যর্থভ্রমে তু তৎ ।
বৈকারিকে তং মায়ায়াং তাং স্বস্মিন্বিরমেত্ততঃ ॥

শুদ্ধঃ সোঽহং পরাত্মৈক ইতি দার্ঢ্যে বিমুচ্যতে ।
হৃদয়ং মে সুগুপ্তং তে প্রোক্তং তত্ত্বং বিচারয় ॥

ইতীশেনোপদিষ্টঃ স জ্ঞাত্বাত্মানং প্রপূজ্য চ ।
তদাজ্ঞপ্তো যয়ৌ রাজ্যং কুর্বন্নপি স দৈবভুক্ ॥

রাজ্যশ্রীপুত্রদারাঢ্যোঽলিপ্তঃ স্বাত্মদৃক্সদা ।
ভুক্ত্বারব্ধং চিরং রাজ্যং দত্বা পুত্রে বিরোচনে ॥

মুক্তসঙ্গশ্চচার ক্ষ্মাং সমদৃক্স গুরূক্তবৎ ॥

ইতি শ্রীবাসুদেবানন্দসরস্বতীবিরচিতং শ্রীদত্তপুরাণান্তর্গতং শ্রীদত্তাত্রেয়হৃদয়ং সম্পূর্ণম্ ।

Found a Mistake or Error? Report it Now