|| శ్రీ శర్వ స్తుతిః (కృష్ణార్జున కృతం) ||
కృష్ణార్జునావూచతుః |
నమో భవాయ శర్వాయ రుద్రాయ వరదాయ చ |
పశూనాం పతయే నిత్యముగ్రాయ చ కపర్దినే |
మహాదేవాయ భీమాయ త్ర్యంబకాయ చ శాంతయే || ౧ ||
ఈశానాయ భగఘ్నాయ నమోఽస్త్వంధకఘాతినే |
కుమారగురవే తుభ్యం నీలగ్రీవాయ వేధసే || ౨ ||
పినాకినే హవిష్యాయ సత్యాయ విభవే సదా |
విలోహితాయ ధూమ్రాయ వ్యాధాయ నపరాజితే || ౩ ||
నిత్యం నీలశిఖండాయ శూలినే దివ్యచక్షుషే |
హోత్రే పోత్రే త్రినేత్రాయ వ్యాధయే వసురేతసే || ౪ ||
అచింత్యాయాంబికాభర్త్రే సర్వదేవస్తుతాయ చ |
వృషధ్వజాయ ముండాయ జటినే బ్రహ్మచారిణే || ౫ ||
తప్యమానాయ సలిలే బ్రహ్మణ్యాయాజితాయ చ |
విశ్వాత్మనే విశ్వసృజే విశ్వమావృత్య తిష్ఠతే || ౬ ||
నమో నమస్తే సేవ్యాయ భూతానాం ప్రభవే సదా |
బ్రహ్మవక్త్రాయ సర్వాయ శంకరాయ శివాయ చ || ౭ ||
నమోఽస్తు వాచస్పతయే ప్రజానాం పతయే నమః |
నమో విశ్వస్య పతయే మహతాం పతయే నమః || ౮ ||
నమః సహస్రశిరసే సహస్రభుజమన్యవే |
సహస్రనేత్రపాదాయ నమోఽసంఖ్యేయకర్మణే || ౯ ||
నమో హిరణ్యవర్ణాయ హిరణ్యకవచాయ చ |
భక్తానుకంపినే నిత్యం సిద్ధ్యతాం నో వరః ప్రభో || ౧౦ ||
ఇతి శ్రీమన్మహాభారతే ద్రోణపర్వణి అర్జునస్వప్నదర్శనే అశీతితమోఽధ్యాయే శర్వ స్తుతిః ||
Found a Mistake or Error? Report it Now
