श्रीअनन्तानन्दाचार्याष्टकम्

|| श्रीअनन्तानन्दाचार्याष्टकम् ||

रामानन्दाग्रणीशिष्यं श्रीरामानन्दमठेश्वरम् ।
अनन्तानन्दमीडेऽहं द्वाराचार्यं जगद्गुरुम् ॥ १॥

आनन्दभाष्यतत्त्वज्ञमात्मानात्मेशबोधकम् ।
अनन्तानन्दमीडेऽहं द्वाराचार्यं जगद्गुरुम् ॥ २॥

ऐहिकामुष्मिकैश्वर्यदातारं भक्तिदानतः ।
अनन्तानन्दमीडेऽहं द्वाराचार्यं जगद्गुरुम् ॥ ३॥

चन्द्रवत् सम्प्रदायाब्धेर्वर्धकं राममन्त्रदम् ।
अनन्तानन्दमीडेऽहं द्वाराचार्यं जगद्गुरुम् ॥ ४॥

वादिनां विदुषां चासत्सिद्धानां मानमर्दकम् ।
अनन्तानन्दमीडेऽहं द्वाराचार्यं जगद्गुरुम् ॥ ५॥

सदाचारोपदेष्टारं सदाचार्यसुरेश्वरम् ।
अनन्तानन्दमीडेऽहं द्वाराचार्यं जगद्गुरुम् ॥ ६॥

शिष्याणां पञ्चसंस्कारकारकं हितकारिणम् ।
अनन्तानन्दमीडेऽहं द्वाराचार्यं जगद्गुरुम् ॥ ७॥

मन्त्रार्थकोविदं चाथ मन्त्रत्रयार्थदं नृणाम् ।
अनन्तानन्दमीडेऽहं द्वाराचार्यं जगद्गुरुम् ॥ ८॥

इति श्रीअनन्तानन्दाचार्याष्टकं सम्पूर्णम् ।

Found a Mistake or Error? Report it Now