Shatru Samharaka Ekadanta Stotram

dēvarṣaya ūcuḥ |
namastē gajavaktrāya gaṇēśāya namō namaḥ |
anantānandabhōktrē vai brahmaṇē brahmarūpiṇē || 1 ||

ādimadhyāntahīnāya carācaramayāya tē |
anantōdarasaṁsthāya nābhiśēṣāya tē namaḥ || 2 ||

kartrē pātrē ca saṁhartrē triguṇānāmadhīśvara |
sarvasattādharāyaiva nirguṇāya namō namaḥ || 3 ||

siddhibuddhipatē tubhyaṁ siddhibuddhipradāya ca |
brahmabhūtāya dēvēśa saguṇāya namō namaḥ || 4 ||

paraśuṁ dadhatē tubhyaṁ kamalēna praśōbhinē |
pāśābhayadharāyaiva mahōdara namō namaḥ || 5 ||

mūṣakārūḍhadēvāya mūṣakadhvajinē namaḥ |
ādipūjyāya sarvāya sarvapūjyāya tē namaḥ || 6 ||

guṇasamyuktakāyāya nirguṇātmakamastaka |
tayōrabhēdarūpēṇa caikadantāya tē namaḥ || 7 ||

vēdāntagōcarāyaiva vēdāntālabhyakāya tē |
yōgādhīśāya vai tubhyaṁ brahmādhīśāya tē namaḥ || 8 ||

apāraguṇadhārāyānantamāyāpracālaka |
nānāvatārabhēdāya śāntidāya namō namaḥ || 9 ||

vayaṁ dhanyā vayaṁ dhanyā yairdr̥ṣṭō gaṇanāyakaḥ |
brahmabhūyamayaḥ sākṣāt pratyakṣaṁ purataḥ sthitaḥ || 10 ||

ēvaṁ stutvā praharṣēṇa nanr̥turbhaktisamyutāḥ |
sāśrunētrān sarōmāñcān dr̥ṣṭvā tān ḍhuṇḍhirabravīt || 11 ||

ēkadanta uvāca |
varaṁ vr̥ṇuta dēvēśā munayaśca yathēpsitam |
dāsyāmi taṁ na sandēhō bhavēdyadyapi durlabhaḥ || 12 ||

bhavatkr̥taṁ madīyaṁ yat stōtraṁ sarvārthadaṁ bhavēt |
paṭhatē śruṇvatē dēvā nānāsiddhipradaṁ dvijāḥ || 13 ||

śatrunāśakaraṁ caivāntē svānandapradāyakam |
putrapautrādikaṁ sarvaṁ labhatē pāṭhatō naraḥ || 14 ||

iti śrīmanmudgalapurāṇē dvitīyēkhaṇḍē ēkadantacaritē dvipañcāśattamō:’dhyāyē ēkadantastōtraṁ sampūrṇam |

Found a Mistake or Error? Report it Now