శ్రీరామహృదయం (Ram Hridayam Telugu)

తతో రామః స్వయం ప్రాహ హనుమంతముపస్థితం .
శృణు యత్వం ప్రవక్ష్యామి హ్యాత్మానాత్మపరాత్మనాం ..

ఆకాశస్య యథా భేదస్త్రివిధో దృశ్యతే మహాన్ .
జలాశయే మహాకాశస్తదవచ్ఛిన్న ఏవ హి .
ప్రతిబింబాఖ్యమపరం దృశ్యతే త్రివిధం నభః ..

బుద్ధ్యవచ్ఛిన్నచైతన్యమేకం పూర్ణమథాపరం .
ఆభాసస్త్వపరం బింబభూతమేవం త్రిధా చితిః ..

సాభాసబుద్ధేః కర్తృత్వమవిచ్ఛిన్నేఽవికారిణి .
సాక్షిణ్యారోప్యతే భ్రాంత్యా జీవత్వం చ తథాఽబుధైః ..

ఆభాసస్తు మృషాబుద్ధిరవిద్యాకార్యముచ్యతే .
అవిచ్ఛిన్నం తు తద్బ్రహ్మ విచ్ఛేదస్తు వికల్పితః ..

అవిచ్ఛిన్నస్య పూర్ణేన ఏకత్వం ప్రతిపద్యతే .
తత్త్వమస్యాదివాక్యైశ్చ సాభాసస్యాహమస్తథా ..

ఐక్యజ్ఞానం యదోత్పన్నం మహావాక్యేన చాత్మనోః .
తదాఽవిద్యా స్వకార్యైశ్చ నశ్యత్యేవ న సంశయః ..

ఏతద్విజ్ఞాయ మద్భక్తో మద్భావాయోపపద్యతే
మద్భక్తివిముఖానాం హి శాస్త్రగర్తేషు ముహ్యతాం .
న జ్ఞానం న చ మోక్షః స్యాత్తేషాం జన్మశతైరపి ..

ఇదం రహస్యం హృదయం మమాత్మనో
మయైవ సాక్షాత్కథితం తవానఘ .
మద్భక్తిహీనాయ శఠాయ న త్వయా
దాతవ్యమైంద్రాదపి రాజ్యతోఽధికం ..

.. శ్రీమదధ్యాత్మరామాయణే బాలకాండే శ్రీరామహృదయం సంపూర్ణం ..

Read in More Languages:

Found a Mistake or Error? Report it Now